RICUARDE
FURLAN
Ricuarde
furlan la tô apocalisse,
ricuarde il moment che ti à ingenoglât,
ricuarde la gnot di chel sîs di Mai,
ricuarde il to borc, distrut, sfruçonât!
Lis cjasis sdrumadis a nulivin di muart,
ferits di ogni bande, berghei, polvaron,
la int disperade e sgjerfave fra i claps,
scunide, avilide, cun disperazion.
Par sot e rugnave, feride, la tiere,
scjassant il Brancot ogni cualchi minût,
maseriis e sanc a passavin pes stradis,
il mond al diseve: Il Friûl ’l è pierdût.
No vevin fat conts cu la antighe Gjarnazie
di int di fature, usade al sudôr,
usade a lis vueris, a lis invasions,
che cence vaî e sapuarte il dolôr.
Tornâts d’ogni dontri a la tiere dai vons,
un clap dongje l’altri, sudant ogni dì,
i fîs di chê tiere cetant sfurtunade,
il vieri Friûl e àn fat resurî.
Roberto Ongaro
